बुलाकी शर्मा
राजस्थान
गरमी अबार भर-जवान है। बीं रा अंग-प्रत्यंग फड़क रैया है। आपरी जवानी माथै इतरावता थकां बा आठूं पहर जलवो दिखा रैयी है। जलवो इत्तो मारक वैâ देख्यां बिना रैइजै कोनी अर देख्यां पछै बीं री फैंट में आवणो ई पड़ै।
बेजा नखराळी है बा। पूरी मॉडर्न। पैला री फिल्मी हिरोइनां अर आज री हिरोइनां री अदावां अर दिखावै में जित्तो आंतरो है, बित्तो ई पैला अर अबार री गरमी में है।
माडर्न बण्यां खुद नै हाई-प्रोफाइल मानण ढूकी है। अंगरेजी सूं लगाव बधग्यो है। डील नै झुळसावणआळी गरमी कै तपतै तावड़ै नै अबै हीट वेव कैवणो पड़ै। अबै लू लागणी बंद हुयगी है, हीट-स्ट्राक ई हुवै। थंडर-स्टार्म नै जे आंधी-तोफान कैय देवां तो नाराज हुयनै बा घणी चरूड़ हुय सकै। मां जद मॉम बणगी, बाऊजी कै बापू, डैड बणग्या तद बा खुद में चैंज करण में लारै कियां रैंवती।
अमरीका जिसा सोफेस्टीकेटेड देस आपांरै विश्व-गुरु भारतवर्ष री बरोबरी नीं कर सकै। बठै गरमी आपरी जवानी री झलक ई देखाई कै डरनै बां इमरजेंसी लगाय दीवी। पण आपां महंगाई, बेरोजगारी, भ्रष्टाचार, पेपर लीक-वीक वगैरह रा जलवा आराम सूं झेलता आयां हां जणै गरमी रै जलवै नै कांई धारां। किसान-मजूर, गरीब- गुरबा तो सदीव सूं परमहंस रैया है। बै ना गरमी सूं झुळसै अर ना सरदी सूं जकड़ीजै। सेठ-साहूकार सगळी रितुवां नै आपरै कब्जै में राखै। आपरै मन मुजब बां नै नचावै।
मारीजै बिचोटिया। मिडिल क्लास। अे ई रोळा-रप्पा करिया करै। शासन अर प्रशासन नै भूंडता रैवै कै भर-गरमी में पाणी री किल्लत है। बीजळी मस्ती सूं लुक-मींचणी रो खेल खेलण लाग रैयी है। अे नीं जाणै कै बे आपांरी सहन सगती बधावण री कोशिश में लाग्योड़ा है। गरमी में तपणो तप है। बे आपांनै तपस्वी बणा रैया है।
मानसून नै आवणो ई है। आसी जणै बिरखा साथै लासी। बिरखा करण रो अर गरमी नै कंट्रोल करण रो जिम्मो है मानसून रो अर गाळियां निकाळां आपां शासन-प्रशासन नै! बां रो त्याग देखो कै गरमी री जवानी रो जलवो देखण रो सांतरो अवसर आपां नै उपलब्ध करवाय रैया है। जवानी -प्रेमी हुवता थकां ई बे जवान गरमी साम्हीं झांकै तकात कोनी। ल्याई अेसी रूम में बैठा रैवै। घूमण-फिरण नै निसरै तो ई अेसी गाड़ी में। बां री सद्भावना नै निंवण करो अर गरमी री जवानी रा जलवा देखो।