बुलाकी शर्मा
राजस्थान
‘वाह रे बीकाणा। गजब थारी सड़क्यां। मोटा-मोटा खाडा (गड्ढे) कादो अर कीचड़… पैदल चालता आपांनै इयां संभळ’र चालणो पड़ै जियां वैâ रस्सी माथै नट चाल्या करै।’
टोडरमलजी नै सगळी ठौड़ कमियां ई दीखै। कादै सूं बचण सारू पजामै नै दोनूं हाथां सूं ऊंचो करतो म्हैं बोल्यो, ‘बिजळी-पाणी कनेक्शन वैâ सीवरेज रो काम हुवै जणै खाडा हुवै अर बिरखा आवै जणै कादो हुवै, फेर सड़क्यां नै कांयरो दोस दे रैया हो भाईजी।’
मूंछ्यां रै बट देवण सारू बे आपरी आंगळ्यां री चिमटी बणावण लाग्या वैâ अचाणचक बांरो अेक पग खाडै में पड़ग्यो। बे पड़ता-पडता बच्या। मूंछ्यां रै बट देवणो भूल’र बै सरकार माथै बट काढण लाग्या, ‘अफसरां-जनप्रतिनिधियां री आंख्यां रै मोतियाबिंद हुयग्यो है। गारंटी पीरियड में ई सड़क्यां रै खाडा हुय रैया है। कूवै में भांग पड़गी है बुलाकी भाई।’
म्हैं समझावण लाग्यो, ‘आपांरै ई हारी-बेमारी पूछ’र कोनी आवै। आपांरी उमर री कोई गारंटी कोनी वैâ कित्ता बरस जीसां। अे तो बापड़ी सड़क्यां है, आं री फेर कांयरी गारंटी?’
अचाणचक म्हांरै कनै सूं फर्राटा मारती अेक कार निकळी अर म्हां दोनां नै कादै सूं सांतरा भरगी। बांरै धोळै-धप्प चोळै माथै कादै रा सैनाण इयां लाग रैया हा जियां वैâ सड़क माथै खाडा। बांरी रीस बधगी, ‘देखली आपांरै बीकाणै री महिमा।’
खुद रै स्हैर बीकानेर नै इयां भूंडणो म्हनै दोरो लाग्यो। बोल्यो, ‘सगळै देस री सड़क्यां रा हालात अेक जिसा है भाईजी, फेर बापड़ी अठै री सड़क्यां में कसर क्यूं काढ़ रैया हो?’
बात मनावण खातर म्हैं झारखंड रै स्हैर बहरागोड़ा रो ताजो हादसो दाखलै रूप राख्यो। अबार रा केंद्रीय कृषि मंत्री अर मध्य प्रदेश रा मामोजी चुनाव प्रचार सारू बठै गया जणै रास्तै में बांरी गाडी कादै-कीचड़ सूं भरियोड़ै खाडै में फंसगी। सुरक्षाकर्मी गाडी खाडै सूं निकाळण री कोसीस में कसर कोनी राखी पण गाडी नै ई खाडै सूं इसो हेत हुयो वैâ बा निकळण नै त्यार कोनी हुई। मंत्री जी दूजी गाडी में बिराज्या अर फर्राटै सूं आगै बधग्या। बां रै लारै सुरक्षाकर्मी ई फर्राटै सूं आप-आपरी गाडियां में रवाना हुयग्या। खाडै सूं हेत राखण आळी बीं गाडी नै दूजै महकमां रा मुलाजिमां निकाळी।
मूंछ्यां पलारता टोडरमल जी हांस्या, ‘थूं वैâवणो क्या चावै भाई।’
‘ओ ही वैâ ना आपां री उमर री गारंटी-वारंटी है अर ना सड़क्यां री गारंटी-वारंटी। आप टैंशन ना लिया करो। ओ इयां ई चालतो रैवणो है।’