बुलाकी शर्मा राजस्थान
देस नै आजाद करावण सारू नेताजी सुभाष चंद्र बोस नारो दियो हो – थै म्हनैं खून दो, म्हैं थांनै आजादी देसूं। अर सोशल मीडिया रै इण जुग में म्हारा बेली टोडरमल जी रो नारो है- थै म्हनैं लाइक दो, म्हैं थांनै लाइक साथै कमेंट देसूं।
बे आपरै नारै री पूरी ईमानदारी सूं पालना करै अर दूजां सूं ई पालना करण री उम्मीद करै। जिका बांरै नारै माथै कान नीं धरै, बै बां री पोस्ट री साव अणदेखी करै। फेसबुक माथै जिका बां री पोस्ट नै लाइक करै, बां लाइकियां री पोस्ट बै बिना चूक्यां, बिना बांच्यां लाइक करै, साथै ई मोकळी बधाई, सुभकामनावां, सांतरो, जय हो थांरी, सरावणजोग आद कमेंट कर’र आपरै फेसबुकिया फ्रेंड्स रो हौसलो बधावै।
लाइक करण रै मामलै में बै भोत उदार है। जिकी फेसबुक पोस्ट साम्हीं आवै, लाइक रो बटण दबावता चालै। इत्तो ध्यान जरूर राखै कै पोस्ट बां नै लाइक करणियै री हुवणी चाइजै। लाइक रै बदळै लाइक री उम्मीद में बै पोस्ट बांचण में जाबक ई टैम जाया कोनी करै। लाइक अर कमेंट करता आगै री पोस्ट कानी बधता रैवै। इण में बां री स्पीड इत्ती तेज है कै जे फेसबुक सूं जुड़ियोड़ां बिचाळै ऑल वर्ल्ड कंपीटिशन कराइजै तो बे लाइक अर कमेंट करण री स्पीड में टॉपर आवै। ओ काम बे इत्तै समर्पित भाव सूं करै कै किणी देवलोकवासी रै समाचार नै ई बै लाइक कर’र बीं ऊपरां ‘सरावणजोग’ कमेंट चैपण सूं कोनी चूकै।
बे लाइक नै बान मतलब शगुन रूप मानै। परिवार-गिनायतां, भायला- जाणकारां रै घरै जद कोई ब्याव हुवै तद आपां बान भरां। सामनै आळै रो चैरो देख’र बान देवां। बान देंवता मन में ओ भरोसो रैवै कै जद आपां रै घरै कोई ब्याव मंडसी तद बै ई आपां रै चैरै मुजब बान भरासी। गांवां में तो ओजूं बही में बान लिखण री परंपरा चालैै। स्हैरी मानसिकता में जीवणियो मिनख लिफाफे में घाल’र बान झलावै तो तुरता-फुरत लिफाफो खोल’र बीं नै सार्वजनिक करीजै अर बही में मांडीजै। बे बान रो पूरो हिसाब राखै। आप दीवी कित्ती अर आयी कित्ती। बान देवणियै नै हिसाब बताइजै कै थारी बान कित्ती जमा रैयगी कै कित्ती बाकी है।
म्हैं ई म्हारै फेसबुकिया फ्रेंड्स सूं अपील करूं कै आप म्हारी फेसबुक पोस्ट लाइक करो अर बदळै में म्हासूं लाइक अर कमेंट दोनूं पावो। जे म्हारी अपील री आप अणदेखी करोला तो म्हारै लाइक अर कमेंट सारू तरसता रैवोला, कान खोलनै सुण लिरावो सा।