रौबीलो राजस्थान : म्हारै भायलै री बैमारी

बुलाकी शर्मा राजस्थान

फेसबुक पोस्ट सूं ठाह लाग्यो कै म्हारो भायलो बैमार है। म्हनैं चिंता हुयगी।
फोन कर’र साता पूछण री ठौड़ उण सूं मिलण सारू बाइक माथै रवाना हुयग्यो। बीं कनै पूग्यो जणै बो तकिये रो सायरो लियां पिलंग माथै बैठ्यो मोबाइल देख रैयो हो।
‘अरे यार, अ‍ेकाअ‍ेक कांई हुयग्यो? काल सिंझ्यां रा तो आपां री बात हुई ही। भलो-चंगो हो।’
मोबाइल ऊपरां निजर टिकायां बीं जवाब दियो, ‘थनै कांई? म्हैं मरूं वैâ जीवूं? फेसबुक माथै पोस्ट लगायां नै म्हनैं अ‍ेक घंटा सूं बेसी हुयग्यो पण थनै लाइक अर कमेंट करण सारू फुरसत कोनी। जबरो भायलो है रे थूं।’
‘चिंता हुई जणै मिलण नै आया हूं नीं।’
मोबाइल सूं निजर हटा’र म्हारै साम्हीं देखतो टोंट करियो, ‘पोस्ट पढ़’र सोच्यो हुसी वैâ म्हैं रामसरण हुवण आळो हूं। आयग्या मराज मिलण नै पण पोस्ट माथै कमेंट कोनी करियो। अबार तांई २०५ लाइक्स और १२७ कमेंट्स आयग्या है, भलो।’
‘कमेंट अर लाइक करणिया अबै थारी बैमारी भूल’र दूजी पोस्टां में उळझियोड़ा हुवैला। म्हैं तो थासूं मिलण नै आयो हूं नीं यार।’
‘थूं जाबक ई डफोळ है भाइड़ा। सोशल मीडिया सूं जुड़’र ई रत्ती भर ई सोशल कोनी। थारी पोस्टां जणैई कमती लाइक करीजै।’ बो म्हनैं समझावण लाग्यो- ‘आ वैâबत सुणी कोनी कांई वैâ जंगळ में नाचणियै मोरियै नै कोई कोनी देखै। थूं मिलण नै आयग्यो पण देख्यो कुण, बता? म्हारी पोस्ट माथै इमोशनल कमेंट करतो जणै सगळां नै ठाह लागतो नीं आपांरै बेलीपै रो।’
म्हैं चिंता करतो पूछ्यो, ‘थारी तबियत कियां है अबै?’
भायलो मुळक्यो, ‘अ‍ेकदम मस्त है। इयांई बैमारी री पोस्ट चैप दीवी वैâ देखां लोगां नै म्हारी कित्ती चिंता है। फैर मोबाइल देखांवतो बोल्यो- ‘देख, कमेंट अर लाइक बधता जाय रैया है। लोग कित्ता चिंतित हुय रैया है अर अ‍ेक थूं है वैâ कमेंट तकात कोनी करियो।’
म्हैं कैयो, ‘सॉरी यार, आगै सूं ध्यान राखसूं।’
भायलो भलै चिड़ग्यो, ‘पण अबार सूं कोनी राखै? इयां कोनी वैâ म्हारै साथै सेल्फी लेय’र पोस्ट लगावै अर लिखै वैâ अबै पैला सूं ठीक है। चिंता री बात कोनी।’
बीं री राय मानता थकां बीं साथै सेल्फी लेय’र बीं नै टैग करनै तुरता-फुरत फेसबुक माथै पोस्ट चैप दीवी अर दोनूं लाइक अर कमेंट री उडीक करण लाग्या।
बो राजी हुवतो बोल्यो,‌ ‘देख, थारी पोस्ट माथै ई लाइक अर कमेंट आवणा सरू हुयग्या है।’